IRPH: Villalabeitiak Parlamentuari gezurra esan eta agerraldia egiteari uko egin dio

villalab

KUTXABANKeko PRESIDENTEAK GEZURRA ESANDIO PARLAMENTUARI, ETA IRPHaren INGURUAN AGERRALDIA EGITEA BAZTERTU DU

AGERRALDI ESKAERARI MUZIN EGIN DIO, KUTXABANK ENTITATE PRIBATUA OMEN DELA ARGUDIATUZ

PARLAMENTUAK ABUSUZKOTZAT JO ZUEN IRPH INDIZEA ERABILTZEA BABESTU DU VILLALABEITIAK

Donostia, 2016-5-31

Gregorio Villalabeitia Kutxabankeko presidenteak gezurra esan dio Gasteizko Legebiltzarrari, eta zuzentzen duen banketxeak IRPH abusuzko indizea erabiltzearen inguruan agerraldia egiteari uko egin dio. IRPH Stop Gipuzkoa plataformak legebiltzarkide talde guztiei eskatu zien Kutxabankeko presidentearen agerraldia bultzatzeko, eta EH Bilduren ekimenez luzatu zion azkenean eskabidea Legebiltzarrak Villalabeitiari. IPRHaren kaltedunen elkarteak eskaera egin zuen ikusi baitzuen Kutxabankek, legebiltzarrak IRPHaren aurka adosturiko ekimenari men egin ordez, indize hau aplikatzen jarraitzen duela eta Arabako Probintzia Auzitegiak berau aplikatzeagatik ezarri zion epaiaren aurka helegitea jarri zuela Espainiako Auzitegi Gorenean.

Bere erantzunean, Kutxabankeko presidenteak legebiltzarrean agerraldia egitea baztertzen du, Kutxabank entitate finantziario prinatua omen delako. Gertakari oso larria da, eragile sozialok azken hilabeteetan zehar salatu duguna argi erakusten duelarik: Araba, Bizkai eta Gipuzkoako hiritarron aurrezkiekin eraikitako Kutxetatik sorturiko entitatea espoliatua izan da, eta gaur egun ez du inolako kontrol publiko edo sozialik.

Gainera, Kutxabankeko presidenteak IRPHaren aplikazioa babesten du bere idazkian, Legebiltzarrak pasa den otsailaren 4ean ebatzi zuen arren «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa». Eta indizea babeste horretan, Kutxabankeko presidenteak gezurra esaten dio Legebiltzarrari. Izan ere, Villalabeitiak dio ez dagoela IRPHa abusuzkoa dela ebatzi duen epai irmorik, eta hori guztiz okerra da. Izan ere, dagoeneko gutxienez bi dira IRPHa abusuzkoa delako baliogabetzen duten epai irmoak. Lehena Valentziako Merkataritza Arloko 3. Epaitegiaren 270/215 epaia da, 2015eko azaroaren 18koa. Eta bigarrena Huelvako Lehen Instantziako 3. Epaitegiko 79/2016 epaia, 2016ko apirilaren 12koa.

Kutxabankeko presidenteak Legebiltzarrari gezurra esatea oso larria da. Horregatik Villalabeitia jauna zigorrik gabe ez geratzea exijitzen dugu, eta Legebiltzarrari eskatzen diogu gezur horri erantzun sendoa eman diezaiola.

Epai irmoen kopurua oraindik txikia da, baina zalantzarik gabe hazten joango da. Izan ere, estatu guztiko epaitegiak pareko epaiak ebazten ari dira. Villalabeitiak bere idazkian harro esaten du IRPH Stop Gipuzkoa elkarteak Donostiako Merkataritza Arloko Epaitegian lortu zituen epaiak, 30 epai baino gehiago, bertan behera utzi zituela Gipuzkoako Probintzia Auzitegiak. Baina esaten ez duena da prbintzia auzitegi hori gero eta isolatuago dagoela IRPHaren babesea. Izan ere, astero astero ezagutzen ditugu Pronbintzia Auzitegiak bertan behera utzitako epaietan oinarritzen diren epai berria, Gipuzkoako Probintzia Auzitegia IRPHaren babesean gero eta isolatuago dagoela eta estatuko epaitegi guztiek aurre egiten diotela gero eta nabarmenagoa da, eta kaltedunok sinetsi nahi dugu azkenean justizia egingo dela epaitegietan. Baina ez da onargarria horrelako iruzur nabarmen baten aurrean epaitegietara jo behar izatea, eta horregatik berehalako konponbideak exijitzen ditugu.

Horregatik exijitzen diogu Lakuako gobernuari bete dezala pasa den otsailaren 4ean Legebiltzarretik jaso zuen mandatuari. Izan ere, parlamentuak eskatu zion «abian jar ditzala eskura dituen bitarteko guztiak, Kontsumobide Kontsumo Institutua barne, indize honek kaltetutako pertsona guztiak defendatzeko». Ia lau hilabete igaro diren honetan, oraindik ez dugu inolako ekimenen berririk.

Oharrak:
Villalabeitiaren erantzuna Legebiltzarraren webgunean dago eskuragarri.
– Epaiak “Epaitegiak” atalean daude eskuragarri.

Kutxabankek Gorenera jo du Arabako epaiaren aurka

salvavidas3

KUTXABANKek HELEGITEA JARRI DIO IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI

ESPAINIAKO AUZITEGI GORENERA ZUZENDURIKO HELEGITEAN KUTXABANKek GASTEIZKO LEGEBILTZARRAK OPAKO, KALTEGARRI ETA ABUSUZKOTZAT JO ZUEN IRPHa BABESTEN DU

IRPH STOP GIPUZKOAren USTEZ DESOBEDIENTZIA JARRERA HAU KRIMINALA DA, ETA VILLALABEITIAren AGERRALDIA ESKATU DU

KUTXABANKek DBHko IKASLEEI EMATEN DIZKIEN IKASTAROAK BERTAN BEHERA UZTEKO ERE ESKATU DU

Donostia, 2016-4-22

IRPH Stop Gipuzkoak gaur egiaztatu ahal izan duenez, Kutxabankek Espainiako Auzitegi Gorenera zuzenduriko helegitea aurkeztu du IRPH Cajas eta IRPH Entidades indizeak baliogabetu eta salaketa jarri zuenari kobraturiko interesak itzultzera zigortu zuen Arabako Probintzia Auzitegiaren epaiaren aurka. Azken asteetako zurrumurruak baieztatu dira beraz.

Bere helegitean Kutxabankek IRPHaren alde egiten du, orain dela gutxi Legebiltzarrak interes tipo hau «opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa dela» adierazi zuen arren.

Modu honetan, Kutxabankek Espainiako Auzitegi Gorenera jo du besteak beste EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Eta helegite hori jartzean otsailean Gasteizko Legebiltzarretik jaso zuen agindu zuzenari entzungor egiten dio. Izan ere, Legebiltzarraren testuak banketxeei eskatzen die «utz diezaiotela IRPHa aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak», eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere.

IRPH Stop Gipuzkoa elkartearen ustez, Kutxabankek abusuzko indize honen babesean hartu duen Legebiltzarrarekiko jarrera desobediente hau kriminala da, desegokia eta gaitzesgarria baita. Gaur sekula baino ozenago Kutxabanken gaineko kontrol publiko eta soziala aldarrikatu eta bere pribatizazioa salatzen dugu. Aurrezki kutxak banku-fundazio bihurtzeko eta inolako kontrol publiko eta sozialik ez duten kudeatzaileen esku jartzeko erabakian atzera egin beharra dago.

IRPH Stop Gipuzkoak bi eskari konkretu dituen gutuna bidali die gaur bertan Gasteizko legebiltzarkide taldeei. Batetik, Gregorio Villalabeitiaren premiazko agerraldia galdegiteko eskatzen diegu.

Eta bestetik, Kutxabank Araba, Bizkai eta Gipuzkoako DBHko ikasleei ematen ari zaien ustezko prestakuntza finantzarioko saioak bertan behera utz ditzan Hezkuntza Sailari zuzenduriko ekimen parlamentario bat eskatu diegu. Legebiltzarrari desobedientea den banketxe kriminal bat ezin dugu gure eskoletan eduki, eta berehala kaleratua izan behar da.

Izan ere, hau ez da IRPHaren inguruan Legebiltzarretik jaso duen agindu bat desobeditzen duen lehen aldia: 2013ko ekainean Legebiltzarrak eskatu zion desagertzekotan zen IRPH Cajas aplikatzeari utzi eta bere kontratu batzuetan aurreikusia zegoen Euribor+1 berehala aplikatzeko. Kutxabankek ez zuen aldaketa berehala egin eta IRPH Cajas indizearen aplikazioa ahalik eta gehien luzatu zuen, bere desagerpen ofizialetik urte bete haratago.

Eta epaitegietan berriz, Kutxabankek hainbat zigor jaso ditu, baita IRPHa engainatzeko asmo argiz erabiltzeagatik ere, Gipuzkoako Probintzia Auzitegiak berretsi zuen epai batek ebatzi zuenez.

Legebiltzarrari behin eta berriz desobeditu eta hainbat aldiz kondenatua izan den banketxea da beraz. Hezkuntza Sailak ikastetxeetara sartzen uztea onartezina da. Berehalako kaleratze bat exijitzen dugu, eta ikastetxetan Kaleratzeak Stop elkarteko kideekin hitzaldiak antolatzeko aukera aztertzea gomendatzen dugu.

Legebiltzarra desobedituz Auzitegi Gorenera joko du Kutxabankek

Logo_naranja_tx

KUTXABANKek IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI HELEGITEA JAR LIEZAIOKE ESPAINIAKO AUZITEGI GORENEAN

GASTEIZKO LEGEBILTZARRAREN AGINDUA DESOBEDITUKO LUKE HORRELA

KUTXABANKen GAINEKO KONTROL PUBLIKO ETA SOZIAL EZA SALATU ETA VILLALABEITIAren AGERRALDIA EXIJITZEN DU IRPH STOP GIPUZKOAk

Donostia, 2016-3-29

IRPH Cajas eta IRPH Entidades indizeak baliogabetu eta Kutxabank salaketa jarri duenari kobraturiko interesak itzultzera zigortzen duen Arabako Probintzia Auzitegiaren epaiari helegitea jar liezaioke Kutxabankek. Gero eta zabalduago daude horren inguruko zurrumurruak, eta eldiario.es komunikabideak atzo argitaraturiko albiste baten bitartez konfirmatu ditu.

Baieztatuko balitz, Kutxabankek Espainiako Auzitegi Gorenera joko luke EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Arabakoa estatuan IRPHa baliogabetuz probintzia auzitegi batek ebatzi duen lehen epaia da.

Azpimarratzekoa da epaitegietako zigor hauetaz gain pasa den otsailean Gasteizko Legebiltzarretik agindu zuzena jaso zuela Kutxabankek. Legebiltzarraren testuak IRPHa erabiltzen duten banketxe guztiei eskatzen die «utz diezaiotela bera aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak» eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere. Legebiltzarraren testua oso gogorra da eta adierazten du «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».

Ondorioz, Kutxabankek Espainiako Auzitegi Gorenera jotzeak Legebiltzarraren aginduari desobeditzea suposatuko luke.

IRPH Stop Gipuzkoa plataformatik uste dugu eskandalagarria dela Kutxabank legebiltzarrari desobeditzen aurrena izatea, kontsumitzaileentzat hain kaltegarria den indizeari eusteko. Herritarren aurrezkiekin sorturiko aurrezki kutxetatik jaiotako banketxea, bere izaera eta helburu sozialak gorde beharko lituzkeena, ezin da izan banketxe guztien artean zitalena. Berriz ere Kutxabanken gaineko kontrol publiko eta soziala exijitzen dugu, eta bere pribatizazio prozesua salatu. Aurrezki kutxak banku-fundazio bihurtzea eta batez ere inolako kontrol publiko edo sozialik ez duten 15 kideren eskuetan uzteko erabakian atzera egin beharra dago berehala. Horrela bakarrik bermatuko dugu legebiltzarraren aginduaren aurkako desobedientzia hau bezalako beste astakeriarik ez egitea.

IRPH Stop Gipuzkoak dei egiten die legebiltzarkide taldeei Gasteizko Legebiltzarrean Gregoria Villalabeitiaren agerraldia premiaz eska dezaten.

Azkenik, Maite Ortiz eta José María Erauskin gure abokatuen lanean dugun konfiantza berresten dugu. Badakigu IRPHa abusuzkoa dela frogatuko dutela Espainiako Auzitegi Gorenean eta baita beste edozein auzitegiren aurrean ere.

Gasteizko Legebiltzarrak IRPHa abusuzkoa dela adierazi eta dirua itzultzeko eskatu du

parlam_irph

GASTEIZKO LEGEBILTZARRAK IRPHa ABUSUZKOA DELA ADIERAZI ETA KOBRATURIKO INTERES GUZTIAK ITZULTZEA ESKATU DU

LAKUARI ESKATU DIO GAINERA ESKURA DITUEN BALIABIDE GUZTIAK ERABILI DITZALA IRPHak KALTETURIKO PERTSONEN DEFENTSAN

IRPH STOP GIPUZKOAK OSO BALORAZIO ONA EGITEN DU, ETA KUTXABANKi ESKUA LUZATZEN DIO DIRUA NOLA ITZULI NEGOZIATZEKO

Gasteiz, 2016-2-4

Gasteizko Legebiltzarreko osoko bilkurak legez besteko proposamen bat onartu du gaur, non zera adierazten den: «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».

Legebiltzarrak, gainera, banketxeei eskatu die «itzul diezazkietela pertsona kontsumitzaileei indize horretan erreferentziaturik kobratutako interes guztiak» eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere.

EAEko hiru hiriburuetako merkataritza arloko epaitegiek dagoeneko ebatzi dituzte zentzu bereko epaiak, baina Gipuzkoako Probintzia Auzitegiak bertan behera utzi ditu Gipuzkoako guztiak, eta beraz legebiltzarraren adierazpena oso garrantzitsua da eta funtsezkoa den une batetan dator.

Gaur onartua izan den testua IRPH Stop Gipuzkoa elkarteak proposatu zuen bere ordezkari José Mari Erauskinek parlamentuan egin zuen agerraldian, eta Araba, Bizkai eta Gipuzkoako Kaleratzeak Stop plataformen babesa du. Izan ere, plataforma hauek IRPHaren desagertzea etxegabetzeak, pobrezia eta berdintasunik ezaren aurkako beraien dekalogoan sartua dute.

Mozioa puntuz puntu izan da bozkatua. IRPHa abusuzkoa dela eta interesak itzuli beharra dagoela dioten puntuak EH Bildu, PSE-EE eta UPyDren botoekin izan dira onartuak, eta EAJ-PNV eta PP abstenitu egin dira.

Gainontzeko puntuetan, Estatuko agintari eskudunei eskatzen zaie dekreta dezatela IRPHaren berehalako indargabetzea, eta Lakuari berriz «abian jar ditzala eskura dituen bitarteko guztiak, Kontsumobide Kontsumo Institutua barne, indize honek kaltetutako pertsona guztiak defendatzeko». Europako agintariei ere egiten zaie eskaera bat: erreferentzia-indizeei buruzko Europako erregelamendu berria IRPHa bezalako indizeei ere aplikagarria izan dadila. Puntu hauek aho batez izan dira onartuak.

IRPH Stop Gipuzkoaren balorazioa oso positiboa da, eta uste du IRPHaren aurkako borrokan mugarri oso garrantzitsua dela. Legebiltzarrak guk bezalaxe IRPHa abusuzkoa dela esatea eta banketxeei kobratu duten guztia itzul dezatela eskatzea pausu historiko bat da.

Ekimena nola gauzatzen den gertutik zainduko du orain plataformak, eta egiaztatuko du eskaera Espainia eta Europako agintaritzei helarazten zaiela.

Banketxeei ere helarazi beharko zaie, eta ikusiko dugu zer modutan erantzuten duten, tartean Kutxabankek, EAEko hiritarrok eraikitako aurrezki kutxetatik sortu zena eta legebiltzarrak abusuzkotzat jo duen indize hau aplikatzen nabarmendu dena. Gure plataformatik Villalabeitia jaunari berriz ere eskua luzatzen diogu dirua nola itzuliko diguten negoziatzen hasteko.

Azkenik, azpimarratzekoa da legebiltzarrak dei zuzena egin diela Lakuari eta Kontsumobideri, eta azken honek zigorrak jartzeko ahalmena duela, IRPH Stop Gipuzkoa elkarteak oso gertutik jarraituko du gobernuak eta Kontsumobidek legebiltzarrak emandako agindua betetzen dutela.

EH Bildu, PSE-EE eta UPyD-k emandako babesa eskertzen dugu, eta PP eta PNVk testua bere osotasunean babesteko ausardiarik erakutsi ez izana tamalgarritzat jotzen dugu. Koherentzia ez nabarmena erakutsi dute, indizea bertan behera uzteko eskatu ondoren egindako kaltea konpontzea ez baitute babestu.

Gasteizko Legebiltzarrak IRPHa eztabaidatuko du ostegunean

parlam_irph

Gasteizko Legebiltzarreko osoko bilkurak ostegun honetan, otsailak 4, IRPHaren aurkako mozio bat eztabaidatuko du, IRPH Stop Gipuzkoa eta Araba, Bizkai eta Gipuzkoako Kaleratzeak Stop elkarteek aurkeztua izan zena.

Testua gure abokatu eta adiskide den Jose Mari Erauskinek aurkeztu zuen 2015 azaroaren 16an Legebiltzarrean egin zuen agerraldian (hemen duzu ikusgai agerraldi osoa), eta onartua izaten bada Legebiltzarrak adieraziko du IRPHa gardentasunik gabea dela, banketxeek bere balioan eragina izan dezaketela, ez dela merkatuaren errealitatearen isla eta kontsumitzaileentzat kaltegarria eta abusuzkoa dela. Gainera, Legebiltzarrak honakoak galdegingo lituzke:
1. estatu mailan dagokion agintaritzari, bertan behera uzteko lehenbailehen.
2. banketxeei, aplikatzeari berehala utzi eta kobraturiko interesak familiei itzultzea, IRPHari loturiko maileguen exekuzioen ondorioz desjabeturiko etxebizitzekin batera.
3. Lakuako gobernuari, eskura dituen baliabide guztiak abian jartzea indize honek kalteturikoen defentsan eta etorkizunean maileguak sina ditzaketenen babeserako.
4. Europako agintaritzei, erreferentzia indizeen inguruko europar araudi berria aplikagarria izan dadila IRPHa bezala banku zentralek prestatuak diren indizeei ere.

IRPH Stop Gipuzkoa elkarteak, Kaleratzeak Stop elkartearekin batera, gutun bat igorri die legebiltzarkide taldeei, ostegunerako bozketan izango duten jarrera ezagutzeko. UPyD izan zen gure mozioa aurkeztu zuena (guk talde guztiek elkarlanean egitea nahiago izan bagenu ere), eta ondorioz babestuko duela pentsa daiteke. EH Bilduk baieztatu du babestu egingo duela, eta PP eta PSEk ez dute erantzun.

PNVk osoko zuzenketa bat aurkeztu du, ekimena edukiz hustuko lukeena. Izan ere, proposatzen duena hau da:
• IRPHa gardentasunik gabea dela, banketxeek beregan eragin dezaketela, merkatuaren isla ez dela eta kontsumitzaileentzat kaltegarria eta abusuzkoa dela adierazten duen zatia kentzea.
• banketxeei aplikatzeari utzi eta kobraturiko interesak eta desjabeturiko etxebizitzak itzultzeko eskaera kentzea.
• Europako agintaritzek erreferentzia indizeen inguruko araudi berrian banku zentralek prestaturiko indizeei salbuespenik ez egiteko eskaera kentzea.

Zuzenketa hori baztertu eta jatorrizko mozioa babesteko eskatzen zion gure gutuna aztertu egingo zuela esanaz erantzun zigun PNVko ordezkariak, baina ez du konfirmatu zein izango den azkenean bere jarrera.

Ostegunean, hortaz, Gasteizko Legebiltzarrean gertatzen denari adi-adi egongo gara. Eztabaida zuzenean jarraitu dezakezu Legebiltzarraren webgunetik, eta berri guztiak une oro ezagutu Twitter bidez gure @irphstop_gpzkoa kontua jarraituz.